السلام عليكم، صديقي المشتري عامل أيه؟
لو مستني أني أطمنك وأقولك أن الدنيا لسه بخير والأسعار جميلة يبقى أنا كده بكدب عليك، ولأن شعرنا الصدق والأمانة أحسن طريق لثقة المشتري تعالى ندردش في شوية حاجات.
أولا حاسس أن أسعار المنتجات كلها مولعة نار أكثر من حر الصيف؟
خليني أقولك حقيقي أن الصيف جاي نار السنة دي بس في أيام بنقدر نتحمل حرها وبتعدي، لكن بالنسبة للأسعار فهي مولعة ومش راضية تعدي.
ولو بتسأل كنا فين؟ فأحنا موجودين، ولو بتسأل أسعاركم أيه؟ فأسعارنا بالنسبة للجودة اللي بنقدمها في السوق مفيش ليها منافس، بس خلينا نفكرك أن كده كده مفيش حاجة رخيصة الدنيا مولعة والأسعار غالية وده واقع عليك كمشتري وعلينا كموزع أو مورد.
ثانياً سألت نفسك ليه الأسعار زادت فجأة وكل حاجة أغلى بنسبة كبيرة من غير سابق إنذار؟
هقولك ليه، تعالى نرجع لشهر فبراير لما البنك المركزي أصدر قرار بوقف التعامل بمستندات التحصيل في كافة العمليات الاستيرادية والعمل بالاعتمادات المستندية بدلاً منها.
تيجي تقولي ده بقى معناه أيه يا مستورد وهيضرني أنا كمشتري في أيه؟
أقولك بكل بساطة أن المستورد بيوفر بضاعة من دولةً ما وبيوزعها في السوق، فالسلعة بتكون متاحة للمستهلك بوفرة وسعرها بيكون الى حداً ما ثابت طالما المستورد بيوفر السلعة بشكل مستمر للموزعين ومنافذ البيع، قام حصل وفي يوم صاحب منفذ بيع كلم موزع طلب منه مثلا ً ١٠٠ قطعة من منتج ما الموزع بص عنده في المخزن لقى أن الموجود من المنتج ده ٢٥ قطعة بس يقوم يعمل أيه يقوم يكلم المستورد ويطلب ١٠٠ قطعة من المنتج ده يقوم المستورد يبص في المخزن عنده ويلاقي أن كل اللي عنده ٥٠ قطعة بس وبص لقى أن مش هيعرف يستورد غيرهم في الوقت الحالي ومجبر أنه يحافظ على ال٥٠ قطعة دول لأن ممكن ميعرفش يستوردهم مرة تانية فرجع قال للموزع للأسف يا موزع أنا مش عندي المنتج ده، بكده الموزع عنده ٢٥ قطعة من المنتج ولنفس السبب مش هيبعهم لمنافذ البيع لأن ممكن ميعرفش يجيب منهم تاني، وبكده المنتج أصبح شبه معدوم في السوق في حين أن المنتج بالفعل عليه طلب في السوق.
قوم يحصل أيه بقي عزيز المشتري؟
الموزع يعمل عملية بالبلدي كده أسمها (تسقيع المنتج) اللي عنده، تيجي تقولي دول كلهم على بعض ٢٥ قطعة هيعملوا أيه يعني؟ أقولك اللي هيحصل أن المنتج مش موجود وكل يوم في طلب زيادة عليه لحد ما يجي في وقت والمنتج سعره ممكن يوصل للضعف وأكثر وهنا المورد يطلع المنتج للموزع، وهنا الموزع يبدأ يرجع المنتج للسوق عن طريق منفذ البيع اللي أشتراها بسعر عالي هو كمان، في النهاية يوصلك المنتج بسعر عالي جداً بكمية أقل من الطبيعي فتبدأ انت كمستهلك تشتري المنتج، لانك ببساطة محتاجه وخايف يخلص من السوق تاني.
لكن خليني أقولك أن مورد عن مورد يفرق لأنك عزيزي المشتري مهم قوي عندنا عكس الباقين، أحنا لحد دلوقتي بنبيع كل المخزون بأسعار تجارية، طبعاً الأسعار زادت بس الزيادة الطبيعية اللي زي ما بيقولوا كده علينا وعليكم، ولما تيجي في يوم وتلاقي في منتجات عايزها خلصت من عندنا ده معناه أنها خلصت فعلا ومتزعلش مننا لأن ده مش بأيدنا وده لأننا زينا زيك مستنين اليوم اللي نقدر نوفرلك فيه كل المنتجات اللي نفسك فيها بأفضل جودة وأحسن سعر.
